სიახლეები | თავისუფალი უნივერსიტეტი
ENG GEO

Search form

სიახლეები

თავისუფალი უნივერსიტეტის ფიზიკის სკოლის გამორჩეული კურსდამთავრებული გიორგი ჭანტურია სრული დაფინანსებით ჩაირიცხა გერმანიის აახენის რეინ-ვესტფალის ტექნიკური უნივერსიტეტის (RWTH Aachen University) სამაგისტრო პროგრამაზე. გიორგი ბაკალავრიატში სწავლის პერიოდში ჩაერთო სამეცნიერო კვლევით საქმიანობაში და საკუთარი კვლევის წინასწარი შედეგები ჯერ 2015 წლის ფიზიკის სტუდენტურ საერთაშორისო კონფერენციაზე (ზაგრები) წარადგინა, ხოლო 2017 წელს მისი ნაშრომი დაიბეჭდა პრესტიჟულ ამერიკულ ჟურნალში (Physics of Plasmas) და მისინახვა შესაძლებელია სამეცნიერო სტატიების არქივშიც (https://goo.gl/6bY6LH). 2017 წელს თავისუფალი უნივერსიტეტის ფიზიკის სკოლის საბაკალავრო პროგრამის დამთავრების შემდეგ, გიორგიმ თავისუფალი და აგრარული უნივერსიტეტის საბუნებისმეტყველო მეცნიერებების სამაგისტრო პროგრამაზე ჩააბარა. სექტემბრიდან კი მისი სურვილის შესაბამისად მსოფლიოს ერთერთ მაღალრეიტინგულ უნივერსიტეტში გააგრძელებს სწავლას.
თავისუფალი უნივერსიტეტის საერთაშორისო ურთიერთობ
თავისუფალი უნივერსიტეტის ბიზნესის სკოლის კურსდამთავრებული, თორნიკე ასათიანი სექტემბრიდან სწავლას London Business School-ში MBA-ს პროგრამაზე გააგრძელებს. LBS ევროპაში ლიდერია ბიზნეს განათლების სფეროში და Forbes-ისა და Financial Times-ის რეიტინგებით მსოფლიოში ტოპ საერთაშორისო MBA პროგრამებში შედის. სწავლისა და ცხოვრების ხარჯებს მთლიანად ბრიტანული მხარე დაფარავს. თორნიკემ თავისუფალი უნივერსიტეტის ბიზნესის სკოლა (ESM) 2014 წელს დაამთავრა, რის შემდეგაც მალევე წამოიწყო წარმატებული სტარტაპი ეკოლოგიურ საკონსულტაციო სფეროში.
თავისუფალი უნივერსიტეტის მათემატიკისა და კომპიუტერული მეცნიერებების (MACS) სკოლის ინჟინერიის მიმართულების მესამე კურსის სტუდენტი თორნიკე ონოფრიშვილი ივლისში იაპონიაში გასამართ საერთაშორისო სიმპოზიუმზე მიემგზავრება. თორნიკე სპეციალურ სესიებზე ორ მოხსენებას წარმოადგენს, რომელიც ეხება ლოგიკური გეიტებისა და დიგიტალური გამაძლიერებლების შექმნას ფოტონური ნანოსტრუქტურების ბაზაზე. თორნიკე უკვე ერთი წელია ჩართულია პროექტში, რომელიც ფინანსდება შოთა რუსთაველის სამეცნიერო ფონდისა და ევროპული მხარის დაფინანსებით. პროექტის ფარგლებში თორნიკე მუშაობს რიცხვითი კოდის შექმნაზე, რომელიც იქნება სწრაფი და ეფექტურად შეძლებს ფოტონური ნანოსტრუქტურების რიცხვით ანალიზს. მიღებული შედეგების ბაზაზე თორნიკე ასევე ამზადებს სამეცნიერო ნაშრომს რეფერირებად ჟურნალში გამოსაქვეყნებლად. თორნიკე ონოფრიშვილის თემის ხელმძღვანელია თავისუფალი უნივერსიტეტის MACS-ის პროფესორი ვახტანგ ჯანდიერი.
თავისუფალი უნივერსიტეტის ბიზნესის ადმინისტრირების სამაგისტრო პროგრამამ (MBA) ოფიციალურად მიიღო CIMA-ს აკრედიტაცია. სტანდარტულ შემთხვევებში 7 გამოცდისთვის მომზადების საფასური 1 960 ბრიტანული ფუნტია (დაახლოებით 6 400 ლარი). CIMA-ს აკრედიტაციის მიღების შემდეგ თავისუფალი უნივერსიტეტის MBA-ს სტუდენტებისთვის კი ეს დამატებით ხარჯს აღარ წარმოადგენს. თავისუფალი უნივერსიტეტის ბიზნესის სკოლის საბაკალავრო სკოლის ფინანსების კონცენტრაციამ CIMA-ს აკრედიტაცია დაახლოებით ერთი წლის წინ მიიღო. თავისუფალი უნივერსიტეტი საქართველოში პირველია, რომლის ბიზნესის სკოლის (საბაკალავრო და უკვე სამაგისტროც) მიერ გაცემული დიპლომის მფლობელს CIMA-ს შვიდი გამოცდა ეთვლება ჩაბარებულად. CIMA (Chartered Institute of Management Accountants) დაფუძნებულია 1919 წელს და დღეს წარმოადგენს მსოფლიოში ერთერთ ყველაზე ავტორიტეტულ და დიდ პროფესიულ ასოციაციას, რომლის სპეციალიზაციაამენეჯერული აღრიცხვა.
თავისუფალი უნივერსიტეტის საერთაშორისო ურთიერთობების სკოლის ჩინური მიმართულების სტუდენტებმა, საქართველოს განათლებისა და მეცნიერების სამინისტროს კონკურსის შედეგად, მიიღეს ჩინეთის სახელისუფლებო სტიპენდიები. გიორგი დარცმელია, სალომე გოგიშვილი, ნიკა ბასილაძე, ანა ქარაბაკი და ვახტანგ ხაბაზი მიემგზავრებიან ერთწლიან სტაჟირებაზე ჩინეთის სახალხო რესპუბლიკის სხვადასხვა ქალაქის წამყან უნივერსიტეტებში, როგორებიცაა სიამენის, ხანჭოუს, ნანკინის უნივერსიტეტები.
თავისუფალი უნივერსიტეტის სამართლის სკოლის კურსდამთავრებული დავით კაკოიშვილი სწავლას შვედეთში, სტოკჰოლმის უნივერსიტეტში საერთაშორისო კომერციული არბიტრაჟის სამაგისტრო პროგრამაზე (Master Programme (LL.M.) in International Commercial Arbitration Law) გააგრძელებს. დავითმა სტოკჰოლმში სწავლის და ცხოვრების ხარჯების დასაფარად შვედეთის სახელმწიფო ორგანიზაციის - შვედური ინსტიტუტის (Svenska Institutet, SI) სრული სტიპენდია მოიპოვა. დავით კაკოიშვილმა თავისუფალი უნივერსიტეტი 2014 წელს დაამთავრა. ამჟამად იგი მუშაობს იურიდიულ ფირმაში BGI Legal იურისტის პოზიციაზე. პარალელურად იგი თავისუფალ უნივერსიტეტში უძღვება ბიზნეს სამართლის კლინიკის კურსს.
ჩვენი კიდევ ერთი სტუდენტი Facebook-ში! ამჯერად MACS-ის მესამეკურსელი ირაკლი ფოფხაძე საზაფხულო სამთვიან სტაჟირებას FB-ს ლოდონის ოფისში გაივლის. სტაჟირების წარმატებით გავლის შემთხვევაში, მომავალ წელს, უნივერსიტეტის დამთავრების შემდეგ, სრულფასოვანი თანამშრომელიც გახდება!
თავისუფალი უნივერსიტეტის ფიზიკის სკოლის მესამე კურსის სტუდენტი მიხეილ სოხაშვილი საზაფხულო ერთთვიან სტაჟირებას (internship) მიუნჰენის ლუდვიგ მაქსიმილიანის უნივერსიტეტში (LMU) გაივლის. გერმანიაში ყოფნისას იგი ჩაერთვება სამეცნიერო კვლევებში რომლებიც მიმდინარეობს LMU-ში. მიუხედავად იმისა, რომ მიხეილი ჯერ კიდევ საბაკალავრო სკოლაში სწავლობს, ის უკვე აქტიურადაა ჩართული თავისუფალი უნივერსიტეტის ფიზიკის სკოლაში მიმდინარე სამეცნიერო საქმიანობაში. მიხეილ სოხაშვილის მიუნჰენში მგზავრობის და ცხოვრების ხარჯებს მთლიანად დაფარავს გერმანული მხარე.
თავისუფალი და აგრარული უნივერსიტეტის სტუდენტებისათვის პროფესორმა შტეფან ვან ვაზენმა (Stefan Van Waasen) ლექციათა კურსი წაიკითხა. კურსის თემა იყო: "გაზომვები და სენსორული სისტემები". შტეფან ვან ვაზენი (Stefan van Waasen) არის იულიხის კვლევითი ცენტრის ინჟინერიის ცენტრალური ინსტიტუტის (ელექტრონიკისა და ანალიტიკის) დირექტორი და გერმანიის დუისბუგ-ესენ უნივერსიტეტის პროფესორი (Duisburg-Essen University). ლექციათა კურსის დამთავრებისას ჩატარდა სტუდენტების შემაჯამებელი ტესტირება და მათ გადაეცათ კურსის გავლის დამადასტურებელი სერტიფიკატი. პროფესორ ვაზენის მიერ კამპუსში ჩატარებული ლექციათა კურსი რიგით მეორე იყო. შარშან ჩატარებული ლექციათა კურსის შედეგების მიხედვით მის მიერ მოხდა აგრარული უნივერსიტეტის ელექტრო და კომპიუტერული ინჟინერიის მიმართულების 4 სტუდენტის შერჩევა, რომლებიც 2017 წლის სექტემბერში 2 კვირით იმყოფებოდნენ იულიხის კვლევით ცენტრში, ე.წ. „შემოდგომის ლექციების“ კურსის მოსასმენად. ასევე, პროფესორმა ვაზენმა იულიხის ცენტრის ელექტრონიკისა და ანალიტიკის ინსტიტუტში 6 თვის ვადით მკვლევარად მიიწვია ელექტრო და კომპიუტერული ინჟინერიის კურსდამთავრებული მიქაელ გაგოშიძე (ამჟამად იქ იმყოფება), რომელიც სექტემბრიდან სწავლას გააგრძელებს გერმანიაში სამაგისტრო პროგრამაზე.

გვერდები