PROGRAMS

სემინარი თემაზე - „ინფრასტრუქტურული შფოთი: თბილისის სიურეალისტურ-ეთნოგრაფიული დღიური“

თავისუფალი უნივერსიტეტის მეხსიერებისა და შფოთვის კვლევის ლაბორატორიის ორგანიზებით, 4 მაისს, 19:00 საათზე, კახა ბენდუქიძის კამპუსის ბიბლიოთეკის საკონფერენციო დარბაზში გაიმართება სემინარი თემაზე - „ინფრასტრუქტურული შფოთი: თბილისის სიურეალისტურ-ეთნოგრაფიული დღიური“.

სემინარი ეძღვნება თბილისის ურბანულ გარემოზე მეხსიერებისა და შფოთვის კვლევის ლაბორატორიის ფარგლებში ჩატარებულ ვიზუალურ კვლევას და მის საფუძველზე შექმნილი ფოტოწიგნის პრეზენტაციას.

მომხსენებლები: მარიამ მენთეშაშვილი, მარიამ გოგია, ლიზი მამულაშვილი, კესო ჯორჯიაშვილი, მარიამ მამისაშვილი.

სემინარი თემაზე: „ჯანდაცვის პოლიტიკა და ფსიქიატრიული პრაქტიკა საბჭოთა და პოსტსაბჭოთა საქართველოში“

თავისუფალი უნივერსიტეტის მეხსიერებისა და შფოთვის კვლევის ლაბორატორიის (FUMA®Lab) ორგანიზებით, 11 მაისს, 19:00 საათზე, კახა ბენდუქიძის კამპუსის ბიბლიოთეკის საკონფერენციო დარბაზში გაიმართება სემინარი თემაზე: „ჯანდაცვის პოლიტიკა და ფსიქიატრიული პრაქტიკა საბჭოთა და პოსტსაბჭოთა საქართველოში“.

შეხვედრა დაეთმობა საბჭოთა კავშირში „ჯანსაღი ადამიანის“ ფენომენის გააზრებასა და იმ მემკვიდრეობის ანალიზს, რომელიც კომუნისტური იდეოლოგიითა და რეპრესიული პოლიტიკით ნასაზრდოებმა სამეცნიერო დისკურსმა და ფსიქიატრიულმა პრაქტიკამ დატოვა პოსტსაბჭოთა საქართველოში.

სემინარს წარუძღვებიან FUMA®Lab-ის მკვლევარი, თავისუფალი უნივერსიტეტის მართვის სკოლის კურსდამთავრებული, ცენტრალური ევროპის უნივერსიტეტის (CEU, ვენა) მაგისტრი ელენე შაფათავა და მართვის სკოლის სტუდენტი მარიამ მაჭარაშვილი. 

მომხსენებლები მიმოიხილავენ საბჭოთა პოლიტიკისა და პროპაგანდის მიდგომებს ჯანმრთელი სხეულის გაგებასა და ფსიქიატრიულ დისკურსთან მიმართებით. ასევე განხილული იქნება საბჭოთა კავშირის სხვადასხვა პერიოდის სამედიცინო ცოდნის წარმოება ამ საკითხებთან დაკავშირებით - როგორ ხდებოდა ფიზიკური და მენტალური ჯანმრთელობის პოლიტიზირება დიდ პოლიტიკურ კონტექსტში.

სემინარი ეფუძნება ელენე შაფათავას საბაკალავრო და სამაგისტრო პროექტებისა და მარიამ მაჭარაშვილის საბაკალავრო ნაშრომის ფარგლებში ჩატარებულ საარქივო კვლევებს. ეს კვლევები აჩვენებს სამედიცინო ინსტიტუციებისა და სხვადასხვა თეორიის ინსტრუმენტალიზაციის მნიშვნელობას ეგრეთ წოდებული „ახალი საბჭოთა ადამიანის“, როგორც „მისაღები პოლიტიკური ერთეულის“ ჩამოყალიბების პროცესში.

სემინარი თემაზე: „ანთროპოლოგიური ანალიზი საქართველოს კონტექსტში: სიზმრები და პოლიტიკა“

თავისუფალი უნივერსიტეტის მეხსიერებისა და შფოთვის კვლევის ლაბორატორიის ორგანიზებით, 18 მაისს, 19:00 საათზე, კახა ბენდუქიძის კამპუსის ბიბლიოთეკის საკონფერენციო დარბაზში გაიმართება ფლორიან მიულფრიდის სემინარი თემაზე: „ანთროპოლოგიური ანალიზი საქართველოს კონტექსტში: სიზმრები და პოლიტიკა“.

შეხვედრა დაეთმობა მომხსენებლის მიმდინარე კვლევას სიზმრების ანთროპოლოგიის მიმართულებით. თანამედროვე ანთროპოლოგიურ ჭრილში სიზმარი განიხილება, როგორც სოციალური, კულტურული და პოლიტიკური განზომილებების მქონე ფენომენი. განსაკუთრებით მნიშვნელოვანი მიმართულებაა სიზმრისა და სოციალური რეალობის ურთიერთკავშირი. მაგალითად, კრიზისის, ომის ან სოციალური ცვლილებების დროს სიზმრები ხშირად ასახავს კოლექტიურ შფოთვებსა და მომავალზე წარმოდგენებს. ამ თვალსაზრისით, სიზმარი შეიძლება განიხილებოდეს როგორც კულტურულად ორგანიზებული წარმოსახვის ფორმა, სადაც პირადი განცდები კოლექტიურ ნარატივებს უკავშირდება. ფლორიან მულფრიდის პრეზენტაცია ეფუძნება საქართველოში მოპოვებულ ეთნოგრაფიულ მასალას, რომლის ფოკუსია საზოგადოებრივ აქტივიზმში ჩართული ადამიანები და იკვლევს თუ როგორ ასახავს მათი სიზმრის ნარატივები მათ აქტივიზმთან დაკავშირებულ შფოთვებს.

ფლორიან მიულფრიდი გერმანელი სოციალური ანთროპოლოგი და ილიას სახელმწიფო უნივერსიტეტის პროფესორია, რომელიც სპეციალიზდება კავკასიის, განსაკუთრებით საქართველოს, კვლევაში. მისი ნაშრომები ნდობის, გაურკვევლობის, სუვერენობისა და სიზმრების ანთროპოლოგიის საკითხებს ეხება. მიულფრიდს ჩატარებული აქვს ხანგრძლივი ეთნოგრაფიული კვლევები საქართველოს მაღალმთიან რეგიონებში.

სემინარი თემაზე: „შფოთვა და მეხსიერება ახალგაზრდებში: სტუდენტური ეთნოგრაფიები მიჩქმალული ადგილებიდან“

თავისუფალი უნივერსიტეტის მეხსიერებისა და შფოთვის კვლევის ლაბორატორიის ორგანიზებით, 25 მაისს, 19:00 საათზე, კახა ბენდუქიძის კამპუსის ბიბლიოთეკის საკონფერენციო დარბაზში გაიმართება სემინარი თემაზე: „შფოთვა და მეხსიერება ახალგაზრდებში: სტუდენტური ეთნოგრაფიები მიჩქმალული ადგილებიდან“.

სემინარზე თავისუფალი უნივერსიტეტის მართვისა და საზოგადოებრივი მეცნიერებების სკოლის სტუდენტები სამი ეთნოგრაფიული კვლევის მიგნებებს წარადგენენ. თითოეული პროექტი სრულიად განსხვავებული გეოგრაფიული და სოციოკულტურული წერტილიდან იკვლევს ახალგაზრდულ სუბკულტურებს.

მოხსენებები შეეხება ახალგაზრდების განცდებსა და მომავლის მოლოდინებს მაღალმთიანი აჭარიდან, თბილისის მიწისქვეშა გვირაბებიდან და დევნილთა დასახლებიდან. ეს ეთნოგრაფიული ნაშრომები სხვადასხვა პრიზმიდან წარმოაჩენს, თუ რა შინაარსითაა დატვირთული წარსულის ხსოვნა და მომავლის შფოთვა ახალგაზრდებისთვის, და რას შეიძლება ნიშნავდეს ქალაქისადმი, რეგიონისადმი ან მეხსიერებისადმი მიკუთვნებულობა თანამედროვე ქართული იდენტობისათვის.

სემინარის ფარგლებში წარმოდგენილი იქნება შემდეგი მოხსენებები:

„მეხსიერება და შფოთვა ორ მომავალს შორის: დევნილი ახალგაზრდების გამოცდილება“ – ნინო ბარბაქაძე.

„ორმაგი იდენტობა აჭარაში“ – მარიამ თოლორაია, ნუცა სეხნიაშვილი, მაგდა ვაშაყმაძე, ანანო დუმბაძე.

„მიწისქვეშა თბილისის ეთნოგრაფია“ – მარიამ გოგია, ნინუცა ენუქიძე, ლილიკო ბერიაშვილი, მარიამ მაჭარაშვილი.