საფრანგეთის ელჩი საქართველოში ეწვია თავისუფალ უნივერსიტეტს

თბილისის თავისუფალ უნივერსიტეტს საფრანგეთის საგანგებო და სრულუფლებიანი ელჩი საქართველოში შერაზ გასრი ეწვია.

ელჩი შეხვდა უნივერსიტეტის რექტორს ვახტანგ ლეჟავას, საერთაშორისო ურთიერთობების სკოლის დეკანს თინათინ ქაროსანიძეს, ფრანგული მიმართულების სტუდენტებსა და ლექტორებს.

სტუდენტებთან შეხვედრისას გაიმართა დისკუსია, სადაც ფრანკოფონმა სტუდენტებმა ისაუბრეს საფრანგეთსა და საქართველოს შორის ისტორიულ, კულტურულ თუ დიპლომატიურ კავშირებსა და სამომავლო ურთიერთობებზე, საფრანგეთში მიმდინარე პოლიტიკურ მოვლენებზე, ევროკავშირის გაფართოების პერსპექტივებზე.

ელჩმა აღნიშნა სტუდენტების მაღალი დონე ფრანგულ ენაში და მზაობა გამოხატა, კვლავ ესტუმროს თბილისის თავისუფალ უნივერსიტეტს და დისკუსიები გამართოს საერთაშორისო ურთიერთობების სკოლის ფრანგული მიმართულების სტუდენტებთან.

შეხვედრისას ასევე ყურადღება დაეთმო სტუდენტების სტაჟირების, გაცვლითი პროგრამების და ერთობლივი კონფერენციების ჩატარების საკითხს.