კამპუსში იაპონური კულტურის ფესტივალი ჩატარდა

კახა ბენდუქიძის საუნივერსიტეტო კამპუსის ხელოვნების დარბაზში ჩატარდა იაპონური კულტურის ფესტივალი აზიისა და აფრიკის იაპონური მიმართულების ორგანიზებითა და საქართველოში იაპონიის საელჩოს მხარდაჭერით.

ფესტივალის ფარგლებში, იაპონიის საელჩოს მოწვევით, გაიმართა ტრადიციული იაპონური ნიღბების თეატრი "ნო"–ს წარმოდგენა, მოწვეული იაპონელი მსახიობების შესრულებით.

იაპონური ნიღბების თეატრი ნო 600–ზე მეტი წლის ისტორიას ითვლის, შუასაუკუნეებში ის წარმოადგენდა იაპონელი სამურაების საყვარელ სანახაობას და შესაბამისად მე–14 საუკუნის პირველი ნახევრიდან მე–19 საუკუნის მეორე ნახევრამდე სარგებლობდა სამურაების ფენის განსაკუთრებული მფარველობით. მე-19 საუკუნიდან, იაპონიაში მომხდარი პოლიტიკური ცვლილებების შემდეგ და სამურაების პოლიტიკური მმართველობის დასრულებასთან ერთად თეატრი ნო–ს ტრადიცია დადგა გაქრობის საფრთხის წინაშე, თუმცა მეოცე საუკუნის პირველი წლებიდან თეატრი სარგებლობდა იაპონიის ახალი მთავრობის მფარველობით, რამაც ხელი შეუწყო ამ თეატრალური სანახაობის ტრადიციის გაგრძელებას.