მათემატიკის, კომპიუტერული მეცნიერების და ინჟინერიის სკოლა

შენობის სისტემების ინჟინერიის საბაკალავრო პროგრამის აღწერა

შენობის სისტემების ინჟინერიის საბაკალავრო პროგრამა ფოკუსირებულია შენობის საინჟინრო სისტემების ინტეგრირებულ, ჰოლისტიკურ ხედვაზე, გაცნობიერებაზე, ანალიზსა და ურთიერთმოქმედების საკითხებზე. კურსდამთავრებულებს შეეძლებათ, როგორც შენობის ცალკეული საინჟინრო სისტემების დაპროექტებაში, მონტაჟში, გამართვასა და მართვაში მონაწილეობის მიღება, ასევე მათ ეცოდინებათ ამ სისტემების ურთიერთქმედების ეფექტები, ამოცანები და გამოწვევები, შეეძლებათ მათი შეფასება და გადაწყვეტა პრაქტიკულ საქმიანობაში.

სტუდენტებს პროგრამა აწვდის სასწავლო კურსებს ინტერდისციპლინური სწავლების გზით, რათა აღზარდოს კომპლექსურად მოაზროვნე, საინჟინრო ამოცანების გადაჭრის უნარის მქონე მომავალი ლიდერები ინჟინერიის ისეთ მიმართულებებში, როგორიცაა შენობის საინჟინრო სისტემები, მისი ინფრასტრუქტურა, ელექტრო და მექანიკური აღჭურვილობა და კონსტრუქციული სისტემების ინჟინერია.

პროგრამის ფარგლებში ინტერდისციპლინური სწავლება გამომდინარეობს ბაზრის კვლევიდან, რომლის თანახმადაც, საქართველოში ინჟინერიის კვალიფიციური პროფესიონალების დეფიციტია ზემოხსენებულ მიმართულებებში. სწორედ ამის გამო, კომპანიებს უწევთ უცხოეთიდან კადრების მოწვევა, ან ფიზიკის და სხვა მომიჯნავე დარგის კურსდამთავრებულთა სამუშაო ადგილზე გადამზადება ასეთი საინჟინრო მიმართულებით. 

პროგრამა სხვა მსგავსი საერთაშორისო პროგრამის გამოცდილებას ითვალისწინებს (მაგალითად: Concordia University, Victoria University) და შექმნილია ადგილობრივი ვითარების, ასევე ქართულად სწავლების საჭიროების გათვალისწინებით და გამიზნულია ხელი შეუწყოს საქართველოში ინჟინერიის სფეროში სწავლების ხარისხის საერთაშორისო სტანდარტებამდე გაზრდას. 

საბაკალავრო პროგრამის წარმატებით დასრულების შემთხვევაში, კურსდამთავრებულს ენიჭება კვალიფიკაცია - შენობის სისტემების ინჟინერიის ბაკალავრი. საბაკალავრო პროგრამის ხანგრძლივობაა 4 წელი.

პროგრამის აღწერა